XIINXALA HAAS-BARRUU OGEESSOTA FAYYAAFI WALLAANAMTOOTAA: HOOSPITAALA WALII GALAA HARAMAAYAA IRRATTI KAN XIYYEEFFATE

Abstract

Ka’umsi qorannoo kanaa waliin dubbiifi wal hubannaa ogeessota fayyaafi wallaanamtootaa keessatti rakkoowwan uumamaniidha. Kaayyoon qorannoo kanaas xiinxala haas-barruu ogeessota fayyaafi wallaanamtootaa: waliin dubbii ogeessota fayyaafi wallaanamtootaa hoospitaala walii galaa haramaayaa irratti xiyyeeffachuun xiinxala gaggeessuudha. As keessatti sababni waliin dubbii isaanii keessatti rakkoon uumamuuf maaliif akka ta’e adda baasuu, wal hubannaa isaanii keessatti wantoonni gufuu ta’an maalfaa akka ta’an xiinxaluufi waliin dubbii isaanii keessatti hangam takka akka wal hubatan gadi fageenyaan xiinxaluun addeessuufi ibsuudha. Qorannoon kun mala qorannoo akkamtaatiin kan gaggeeffame ta’ee, Yaadiddama qorannoo gochaa sanyaabsaa fayyadamuun kan gaggeeffameedha. Maddi ragaalee qorannoo kanaa madda raga tokkoffaadha. Dhuma irratti argannoon Qorannoo kanaas, Waliin dubbii ogeessoni fayyaafi wallaanamtoonni gaggeessan keessatti akka isaan wal hin hubanneef wantoonni sababa ta’an, ogeessonni fayyaa afaan wallaanamtootaa sirritti beekuu dhabuufi waliin dubbiin doktoroonni tokko tokko wallaanamtootaa wajjiin gaggeessan ulaagaa waliin dubbii guutuu dhabuu, dhukkubsattoonni dabaree eeggachuuf osoo wallaansa hin arganne turuu, jechoota haaraafi hiikaa tokkoo ol qabu fayyadamuu, garaagarummaa loogaafi afaan walii sirritti beekuu dhabuu akka ta’e qorannoo kana keessatti bira ga’ameera. Walumaa galatti rakkoo kana furuuf waliin dubbiin ogeessonni fayyaa wallaanamtootaa wajjiin gaggeessan kan wallaanamtoota jiddu gala godhate ta’uu akka qabuufi immoo duudhaa ogummaa isaaniin hoggananuufi madaalamuu qabaaachu akka furmaataatti lafa kaa’ameera.